ಯಾದವ ನೀ ಬಾ ಯದುಕುಲ ನಂದನ

ಮಾಧವ ಮಧುಸೂದನ ಬಾರೋ |

ಸೋದರಮಾವನ ಮಧುರೆಲಿ ಮಡುಹಿದ ||

ಯಶೋದೆ ಕಂದ ನೀ ಬಾರೋ ||ಪ ||

||ಯಾದವ ನೀ ಬಾ ||

ಕಾಲಲಿ ಕಿರುಗೆಜ್ಜೆ ಘಲುಘಲಿರೆನುತಲಿ |

ಝಣ ಝಣ ವೇಣುನಾದದಲಿ |

ಚಿಣಿಕೋಲು ಚೆಂಡು ಬುಗುರಿಯನಾಡುತ |

ಸಣ್ಣವರ ಒಡಗೂಡಿ ನೀ ಬಾರೋ ||

||ಯಾದವ ನೀ ಬಾ ||

ಶಂಖ ಚಕ್ರಗಳು ಕೈಯಲಿ ಹೊಳೆಯುತ |

ಬಿಂಕದ ಗೋವಳ ನೀ ಬಾರೋ |

ಅಕಳಂಕ ಮಹಿಮನೆ ಆದಿನಾರಾಯಣ |

ಬೇಕೆಂಬ ಭಕುತರ ಬಳಿ ಬಾರೋ ||

||ಯಾದವ ನೀ ಬಾ ||

ಖಗವಾಹನನೇ ಬಗೆಬಗೆರೂಪನೆ |

ನಗುಮೊಗದರಸನೆ ನೀ ಬಾರೋ |

ಜಗದೊಳು ನಿನ್ನಯ ಮಹಿಮೆಯ ಪೊಗಳುವೆ |

ಪುರಂದರ ವಿಠಲ ನೀ ಬಾರೋ ||

||ಯಾದವ ನೀ ಬಾ ||

***