ವೆಂಕಟರಮಣನೆ ಬಾರೋ

ಶೇಷಾಚಲವಾಸನೆ ಬಾರೋ|| ಪ||

ಪಂಕಜನಾಭ ಪರಮ ಪವಿತ್ರ

ಶಂಕರ ಮಿತ್ರನೇ ಬಾರೋ ||

|| ವೆಂಕಟರಮಣನೆ ಬಾರೋ ||

ಮುದ್ದು ಮುಖದ ಮಗುವೇ

ನಿನಗೆ ಮುದ್ದು ಕೊಡುವೆನು ಬಾರೋ|

ನಿರ್ದಯವೇಕೋ ನಿನ್ನೊಳಗೆ ನಾನು

ಹೊಂದಿದ್ದೇನೊ ಬಾರೊ||

|| ವೆಂಕಟರಮಣನೆ ಬಾರೋ ||

ಮಂದರಗಿರಿಯನು ಎತ್ತಿದಾನಂದ

ಮೂರುತಿಯೇ ನೀ ಬಾರೋ|

ನಂದನ ಕಂದ ಗೋವಿಂದ ಮುಕುಂದನೇ

ಇಂದಿರೆಯರಸನೆ ಬಾರೋ||

|| ವೆಂಕಟರಮಣನೆ ಬಾರೋ ||

ಕಾಮನಯ್ಯ ಕರುಣಾಳು

ಶಾಮಲವರ್ಣನೇ ಬಾರೋ|

ಕೋಮಲಾಂಗ ಶ್ರೀ ಪುರಂದರ ವಿಠ್ಠಲನೇ

ಸ್ವಾಮಿ ರಾಮನೇ ಬಾರೋ ||

|| ವೆಂಕಟರಮಣನೆ ಬಾರೋ ||

***